Wel dyma chi ddiddorol. Llythr gan ffrind at Mary Owen, tra’n hwylio ar long RMS Queen Mary am Efrog Newydd. Mae’n debyg roedd Mary Owen yn gwerthu hufen ia gyferbyn a Chastell Caernarfon pan gwrddodd a Mrs. Smith o’r Unol Daliaethau ym 1961.
Dyddiadau penblwydd
Mawrth 24, 2007 — siwtcestaid
Dyma daflen sy’n adnodd gwych ar gyfer hel achau. Mae’n nodi penblwyddi aelodau teulu William Owen. Gellir dyddio’r rhestr i 1937-1939.
“R. R. Owens, October 26, 1880 – 57 years” – Pyw?
“L. R. Owens, June 25, 1884 – 54 years” – Pwy?
“H. R. Owens, Feb. 28, 1889 – 49 years” – Pwy?
“Laura Owens, Jan. 4, 1893 – 44 years” – Anti Laura fy mam.
“W. R. Owens, June 21, 1901 – 37 years” – William Owen?
“R. R. Owens, Oct. 22, 1905 – 32 years” – Pwy?
“Jinnie, Dec. 13, 1911 – 26 years” – Anti Jinnie, cofio hi’n iawn. Cofio mynd i’w gweld yn Rhosgadfan. Daeth hi draw i dreulio un Nadolig gyda ni yng Nghaernarfon.
“Priodas mam, Feb 1901″ – Mam pwy? Mam William Owen?
“Annie Owen, Aug. 1st, 1914″ – Nain.
“Gaynor Pierce, Nov. 14, 1932″ – Anti Gayn (hanner-chwaer mam), Tregarth, a farwodd y llynedd.
“R. Pierce, Dec. 27, 1935″ – Yncl Robin (hanner-brawd mam), sydd yn briod a Gwenda ac yn byw ym Mhontnewydd.
“W. Pierce, Aug. 4th, 1937″ – Yncl Wil (hanner-brawd mam), sydd wedi priodi Enid ac yn byw ym Mhenrhosgarnedd, Bangor.
“Mary Owen, Feb. 19, 1944″ – Mam, sy’n byw ger Wrecsam.
A wyddoch chwi?
Mawrth 22, 2007 — siwtcestaid
Cwestiynnau a anfonodd Mary Owen i’r Cymro… beth yw’r atebion?
1. Beth oedd enw’r llong yr hwyliodd Christopher Columbus ynddi i’r America?
2. Pwy a ddyfeisiodd y teleffon?
3. Pa un yw’r bont hwyaf yn y byd?
4. Ym mha le y ganed (a) W. J. Gruffydd; (b) T. H. Parry-Williams; (c) W. Ambrose Webb?
5. Beth oedd enw bedydd (a) Eifion Wyn; (b) Pedrog; (c) Eben Fardd?
Mary Owen (Rhif 3), 5 Bro Cadfan, Rhosgadfan [ca. 1950]
Stori yw bywyd
Mawrth 22, 2007 — siwtcestaid
Pennill a anfonfwyd gan Mary Owen, i’r Cymro tybiwn i. Dw’n i ddim faint oedd ei hoed, yn sicr nid 3. Beth mae (3) yn golygu? Y drydedd safle? A’i Mary Owen ysgrifennodd y bennill? Pryd? Diwedd y 40au?
“Stori yw bywyd mewn tair cyfrol, A fu, y sydd, a’r un dyfodol. Y gyntaf wedi ei gorffen sydd; Darllennir yr ail o ddydd i ddydd; Y drydedd – llyfr seliedig yw, A’r allwedd iddo yn llaw Duw”.
Mary Owen (3), 5 Bro Cadfan, Rhosgadfan, [ca. 1950]
